નવસારી કૃષિ યુનિવર્સિટીના કુલપતિ ડૉ. આર. એમ. નાઈકે વઘઈના હિલ મિલેટ રિસર્ચ સ્ટેશનની લીધી મુલાકાત

કુલપતિની આ પ્રગતિશીલ મુલાકાતમાં યુનિવર્સિટીના અન્ય વરિષ્ઠ અધિકારીઓ પણ જોડાયા હતા, જેમાં સંશોધન નિયામક ડૉ. ટી. આર. અહલાવત, વિસ્તરણ શિક્ષણ નિયામક ડૉ. એચ. આર. શર્મા, વિદ્યાર્થી કલ્યાણ નિયામક પ્રો. જૈમીન નાઈક, તેમજ સહ-સંશોધન નિયામકો ડૉ. વિકાસ આર. નાઈક અને ડૉ. લલિત મહાત્માનો સમાવેશ થાય છે. વાઘઈ કેન્દ્રના યુનિટ હેડ અને સહયોગી સંશોધન વૈજ્ઞાનિક ડૉ. પરેશ એ. વાવડીયાએ તમામ મહાનુભાવોનું ઉષ્માભર્યું સ્વાગત કર્યું હતું અને સમગ્ર ફાર્મ ભ્રમણનું સંચાલન સંભાળ્યું હતું. 

મુલાકાત દરમિયાન કુલપતિ ડૉ. આર. એમ. નાઈકે બંને સંશોધન ફાર્મ પર ચાલી રહેલા વિવિધ કૃષિ પ્રયોગો, ક્ષેત્રીય પ્રવૃત્તિઓ અને ખાસ કરીને હલકા ધાન્ય (Small Millets – જેમ કે નાગલી, વરી, બંટી વગેરે) ના પાકોની સુધારેલી જાતોના બિયારણ ઉત્પાદનનું બારીકાઈથી નિરીક્ષણ કર્યું હતું. તેમણે ત્યાં કાર્યરત કૃષિ વૈજ્ઞાનિકો અને સ્ટાફ મિત્રો સાથે સીધો સંવાદ સાધીને સંશોધનોની પ્રગતિ વિશે ચર્ચા કરી હતી. 

બપોરના સત્રમાં એક વિશેષ બેઠક યોજાઈ હતી, જેમાં યુનિટ હેડ દ્વારા છેલ્લા પાંચ વર્ષ દરમિયાન કેન્દ્ર દ્વારા કરવામાં આવેલા સંશોધનો અને ખેડૂતલક્ષી વિસ્તરણ પ્રવૃત્તિઓનો વિગતવાર અહેવાલ રજૂ કરવામાં આવ્યો હતો.